0
యూట్యూబ్‌లో కేక పుట్టిస్తున్న జతిన్
ఈ చిత్రంలో కనిపిస్తున్న కుర్రాడి కళ్లలోకి ఒక్కసారి చూడండి. ఎంత ఆత్మవిశ్వాసంతో కనిపిస్తున్నట్లు ఉన్నాడో కదూ! అవును మరి. పట్టుమని పదహారేళ్లు కూడా నిండని ఈ కెనడియన్ కుర్రాడు జతిన్ బైబర్ యూట్యూబ్‌లో కేక పుట్టిస్తున్నాడు. ఇతని మ్యూజిక్ వీడియో 'బేబీ' ఈ ఏడాది ప్రపంచాన్ని ఓ ఊపు ఊపేసింది. యూట్యాబ్‌లో ఈ వీడియోను 40 కోట్ల మంది వీక్షించారు ఇప్పటికే. ఈ ఏడాది ఎక్కువ మంది వీక్షించిన యూట్యూబ్ వీడియోల జాబితాలో జతిన్ 'బేబీ' తొలిస్థానం దక్కించుకుంది.
కెనడా కుర్రాడు..
జతిన్ కెనడాకు చెందిన ఒంటారియో సమీపంలోని స్ట్రాట్‌ఫోర్డ్‌లో అందరు పిల్లల్లాగే బుద్ధిగా బడికి వెళ్లేవాడు. స్థానికంగా పేరున్న కొన్ని సంగీత సంస్థలు పోటీలు పెడుతుంటే వెళ్లి పాల్గొన్నాడు. తనకు ముందు నుంచి పాప్ మ్యూజిక్ అంటే చాలా ఇష్టం. ఆ పోటీల్లో జతిన్‌కు ద్వితీయ బహుమతి వచ్చింది. అక్కడి నుంచి అతను వెనుదిరిగి చూడలేదు.
రాకెట్‌లా రివ్వున దూసుకెళ్లాడు. గిటార్, పియానో, ట్రమ్‌పెట్‌లలో తర్ఫీదు పొందాడు. తను పాటల పోటీల్లో పాడిన గీతాలన్నిట్నీ యూట్యూబ్‌లో పోస్ట్ చేయడం ప్రారంభించాడు. ఇంటర్‌నెట్‌లో మ్యూజిక్ వీడియోలను డౌన్‌లోడ్ చేసుకొనే వాళ్ల సంఖ్య బాగా పెరిగిపోయింది. 13 ఏళ్ల వయసులోనే కోటిమంది అభిమానులయ్యారు. 'ఇదేదో బాగుందే' అనుకుంటూ తనకంటూ ఓ బ్రాండ్‌ను సృష్టించుకోవాలని మార్కెటింగ్ మేనేజర్‌ను కూడా పెట్టుకున్నాడు జతిన్. ఇద్దరూ ఓ రోజు అట్లాంటా వెళ్లి ప్రసిద్ధ సంగీతకారులు ఉషర్, టింబర్‌లేక్‌లను కలిశారు.
అప్పటికే వాళ్లకు జతిన్ పేరు బాగా తెలుసు. అందుకే, అందరూ కలిసి ఓ మ్యూజిక్ ప్రోగ్రామ్ చేద్దామనుకున్నారు. అంత పెద్ద సింగర్లతో పోటీపడి జతిన్ పాడిన పాటలు ఉర్రూతలూగించాయి. ఆ తర్వాత తనే సొంతంగా 'వన్ టైమ్' మ్యూజిక్ వీడియోను రిలీజ్ చేశాడు. ఇది అమెరికా, కెనడాలలో టీనేజర్లను కట్టిపడేసింది. ఈ సంచలనాన్ని చూసి ఎంటీవీ వాళ్లు జతిన్‌ను పిలిచారు. ఏటా జరిగే ఎంటీవీ వీడియో మ్యూజిక్ అవార్డులకు వ్యాఖ్యాతగా చేయమన్నారు. ఎగిరిగంతేశాడు జతిన్.
ఈ కార్యక్రమంతో ప్రపంచవ్యాప్తంగా సంగీతాభిమానులందరికీ పరిచయమయ్యాడు. తనకు తెలియకుండానే బిజీ బిజీ అయిపోయిన జతిన్.. ఇప్పటి వరకు పదులసంఖ్యలో ఆల్బమ్స్ విడుదల చేసి కోటీశ్వరుడు కూడా అయ్యాడు. ఆ పిల్లాడి ప్రతిభను చూసి.. 'బెట్', 'జూనో', 'ఎంవైఎక్స్'... అవార్డులు వరించాయి. తాజాగా యూట్యూబ్‌లో జతిన్ వీడియో 'బేబీ' తొలిస్థానంలో నిలవడంతో మళ్లీ ఒక్కసారిగా అందరినీ తనవైపు తిప్పుకున్నాడు ఈ పదహారేళ్ల పాప్ సింగర్.
0Awesome Comments!